Се За Домот | Актуелности од Саемот на мебел Милано 2013

Актуелности од Саемот на мебел Милано 2013

The Salone Internazionale del Mobile е името под кое е препознатлив саемот на мебел во Милано. Производителите и оваа година ја претставија својата понуда во делот на опремување на ентериерот и градината.

На саемот беше силно забележлива тенденцијата кон природата, природното и екологијата во материјалите, боите, формите ... Палетата на бои се движи од светло сива, преку беж тоновите, па сè до темно кафените нијанси. Покрај овие, исклучително застапени се и живите бои, особено сината, од петролеј нијанса до тиркизна, во комбинација со жолтата, зелена и портокалова.

Дрвото како материјал е особено присутно, а најмногу дабовото дрво. На сметка на застапеноста на дрвото, употребата на металот како материјал е минимизирана. Притоа, особено е застапена 3Д обработка на дрвото на фронталните површини и деталите.

Мотивите кај ткаенините се разновидни – геометриски, цветни, животински, етно, patchwork.

Подните облоги многу често имаат рустикален изглед, со мазна или пак нерамна завршна обработка.

Во голема мера доминираат мат површините, со исклучок на стаклените материјали. Стаклото и оваа година е присутно, и тоа особено кога е затемнето во сиви и кафени тонови.

Во тренд се парчињата мебел во класичен стил кои се донесени на модерен начин, како на пример, преку комбинирање на минималистички стил со поединечни класични парчиња.

Кај мебелот многу често острите и рамни линии се заменети со овални линии, инспирирани од ретро мотиви, масите се со заоблени ивици, а гарнитурите за седење,столиците и креветите се со меки форми.

Трендот на удобно живеење, со можност за брза трансформација во согласност на потребите, особено се забележува кај гарнитурите за седење и клуб масите кои се повеќефунционални, со можност за ротација или извлекување на одредени елементи.

на почеток