Декорирањето на новогодишната софра е активност во која може целосно да ја вклучите вашата фантазија, со цел да создадете уникатен празничен амбиент во новогодишните празници. Еве неколку насоки како полесно да дојдете до посакуваниот ефект.

Најпрво одлучете се дали масата ќе биде украсена со една боја во повеќе нијанси, или пак со комбинација од повеќе бои. Традиционални бои кои се користат за оваа прилика се црвената, златната, сребрената, белата и зелената, а сè почесто се користат и виолетовата и сината.

Црвената боја како дел од новогодишната традиција е боја со која не може да погрешите. Доколку трпезата има прекривка со силно изразена црвена декорација, како на пример чаршав со мотиви од цвеќето божиќна ѕвезда, поставете бели чинии и тоа може да биде и сосема доволно. Црвената боја одлично се комбинира со златни, сребрени и бели детали.

Белата боја делува чисто и свечено, особено ако ја комбинирате со златни и сребрени тонови, кои може да ги има во декоративни предмети, како на пример, свеќниците., порабувањето на чаршавите, рабовите на чиниите...

Зелената боја е одлична боја за новогодишните празнувања, без разлика дали е претставена преку гранчиња од зимелени растенија или зелени ткаенини.

Така, над белиот чаршав може да биде поставена зелена прекривка која ќе биде украсена со гранче божиковина и шишарки.

Лампионите не мора задолжително да бидат поставени само на елка, туку одлично изгледаат и кога се поставени на масата. Може да бидат без дефиниран распоред на масата или пак да се ставени во сад, а истите може да се комбинираат со ореви, бадеми, шишарки... Притоа, бисери и циркони на масата може да бидат одлична асоцијација за снегот.

  на почеток