По професија е продукт-дизајнер, a на голема врата влегува во архитектурата и дизајнот на ентериери, како и во сите други сфери на дизајнот. Препознатлив е по современите идеи и концепти, аморфните облици и комбинации на флуоресцентни бои кои го карактеризираат секое негово дело, без разлика дали станува збор за парче мебел, предмет или ентериер.

Роден е во Каиро 1960 година, а како дете се преселува со родителите во Канада. Во Отава дипломира индустриски дизајн и заминува на постдипломски студии во Италија. Денес успешно води приватно дизајнерско студио во Њу Јорк, каде што живее со сопругата.

Добитник е на бројни интернационални награди и признанија во областа на дизајнот на продукти и ентериери. Автор е на неколку монографии и публикации. Често гостува како предавач на факултетите за дизајн во Америка, Европа и Азија.

До денес, Карим Рашид дизајнирал преку 3.000 производи, во 35 земји во светот, а неговиот разновиден опус го чинат ентериери, парчиња мебел, расветни тела, садови за јадење, играчки, предмети и мебел за деца, наочари, облека за возрасни итн.

Работел на идентитетот на брендовите на Ситибанк и Хјундаи, изложби за Дојче Банк и Ауди, дизајнирал хај-тек уреди за Самсунг, кујнски апарати за Горење, кујни за Скаволини и Горење, луксузен накит за Veuve Clicquot и Swarovski.


Уникатен простор за семејството

Карим Рашид за сопругата и за себе го креирал овој уникатен животен простор во целост – сите површини, материјали, мебелот и предметите ги има креирано Рашид.

Станот го адаптирал според сопствени нацрти – се ослободил од сите ѕидови и прегради, и на тој начин создал слободен тек во просторот. Отворениот план му овозможува флексибилност во распоредот на простории, а по потреба и изградба на нови соби на различни места во станот.

Нежна, но футуристичка атмосфера постигнал со контрастот на белата боја и изобилството на природна светлина во комбинација со органските облици од современи материјали и розовиот епоксиден под, како и со ведрите комбинации на флуоросцента жолта, розева, портокалова боја.

Тој смета дека суштината на дизајнот е подобрување на животниот простор во естетска и емоционална смисла. За него светот би бил многу поубав кога би биле опкружени со вистински современи предмети и простори, а се труди со дизајнот да ја приближи убавината и дражта на дигиталното време во кое живееме. Негова желба е луѓето да се ослободат од чувството на носталгија, наметнатите правила и традиционалното толкување на убавината и кичот.