Се За Домот | Тајните на добриот абажур

Тајните на добриот абажур

Обликот, материјалот и бојата на абажурот го одредуваат интензитетот на светлото во просторот, но и кој дел од него ќе биде осветлен. Токму затоа важно е при купувањето да ја одберете вистинската ламба за вашите потреби. Без разлика дали е потребен простор за релаксација или добро осветлување во работната соба, саканата атмосфера може да ја постигнете со добро избрана ламба. Пред да ја купите вашата ламба, најпрвин добро согледајте го просторот во кој ќе ја поставите и определете дали тој треба да биде целосно осветлен или само дискретно.

Форми, материјали и бои на абажурот

Конус

Конусниот абажур е со поширок пречник на долната страна, па така светлината се насочува надолу. Идеален е за поставување на наткасната во спалната соба бидејќи дава светло за читање, додека во исто време другиот дел од собата е благо осветлен.

Правоаголник

Ламбата со ваков облик емитува широк сноп на светлина и над неа и под неа. Претставува добар избор доколку во собата ви е потребно повеќе светло.

Ткаенина

Памучните или свилените материјали се вклопуваат во скоро секој простор. Интензитетот на светлото кое го пропуштаат зависи исклучиво од нивната текстура и боја, чиј избор секако ќе биде определен од потребите и вкусовите.

Стакло

Еднобојното, проѕирно стакло пропушта силна светлина, која добро го осветлува целиот простор, додека пак пескареното е идеално за поинтимна атмосфера.

Ратан

Низ испреплетените прачки од ратан се прекршува топло, нежно светло. Доколку е со зелена боја, одлично се вклопува со дрво и кожа.

Пехар

Светлината се одбива од долниот затворен дел на абажурот со облик на пехар и се насочува исклучиво нагоре. Една ваква ламба ќе ви биде доволна силно да се осветли просторијата, па така доколку не ги сакате лустерите или плафоњерките, таа ќе претставува идеално решение.

Топка

Светлината од стаклената топка рамномерно се емитира по просторијата, па затоа ваквата ламба може да ја поставите било каде. Секако, интензитетот на светлината ќе зависи и од бојата на стаклото.

Боја

Жолтеникавите, беж и кафените нијанси на абажурот емитираат светло кое е идеално за потопла, посталожена атмосфера, па така се препорачуваат за поинтимни простории, како на пример спалната соба.

Белата стаклена ламба создава јасно, чисто светло и може да ви биде и доволно доколку имате навика за работа во доцните ноќни часови.

Матираните варијанти на бело стакло или платнениот абажур даваат слично, но попригушено светло.

Зелената и сината боја се вбројуваат во студени бои и емитираат исто такво светло – сино и студено. Доколку ги сакате ламбите во боја, а сепак сакате малку потопол сјај, може да одберете сина боја со примеси на црвена, какви што се розовата и виолетовата боја.

на почеток