Клима уредите може да се користат како исклучително ефикасни грејни тела поради фактот дека трошат помалку електрична енергија (во споредба со топлотната енергија која ја ослободуваат) од останатите грејни тела кои работат на струја.
Така за 1,2 kW потрошена електрична енергија климата емитира 2,5-3,8 kW енергија (податоците се за клима со 12000 BTU, а количеството на емитирана енергија зависи од енергетската класа). Тие, освен електричната енергија, ја користат и енергијата на фреонот.
Притоа, ефикасноста на загревањето зависи од типот на клима уредот и од надворешната температура. Најниските работни температури на клима уредите се наведени во нивните спецификации. Кај класичните клима уреди одат и под нулата (обично до -5°C), а кај клима уредите со инвертер технологија претежно до -15°C.
Карактеристични појави при греење со клима уред
• При вклучување на клима уредот, ќе забележите дека се отвораат крилца за насочување на воздухот, но дека климата веднаш не почнува со внесување на воздух, како што би било случај во режимот на ладење, бидејќи тоа би бил студен воздух. Потребно е одредено време од неколку минути за да се загрее сакето на внатрешната единица и дури тогаш климата почнува да внесува млак воздух.
• Во зима, кога се користи режимот за греење, надворешната единица е студена, па од неа излегува вода, за разлика од режимот во лето кога ситуацијата е обратна и водата излегува од внатрешната единица. Количината на вода која излегува зависи од влажноста на воздухот и од моќноста на уредот.
• Климата уредот не е електрична греалка, туку топлотна пумпа. Ниските температури предизвикуваат низок притисок на гасот, а со тоа и послабо загревање.