Во становите неретко се случува просторот наменет за бањата да биде со мала површина. Сепак, и малата бања може да биде доволно функционална и пространа доколку се обрне внимание на неколку работи:

• Во мала бања поставете туш кабина, која ќе зафаќа помалку простор отколку класичната када, а притоа проѕирната стаклената врата ќе дава илузија на поголем простор. Поставена во аголот, туш кабината е добар избор за мали бањи.

• Кога станува збор за избор на машина за перење алишта, машините со горно полнење се погодни за мали бањи бидејќи се потесни, а и вратата не зафаќа дополнителен простор.

• За складирање на предметите во малите бањи најдобро решение се полиците од подот до таванот, каде што ќе може да ги одложите сите потребни работи. Притоа дел од полиците добро е да бидат затворени. Исто така, висечките орманчиња се одлично решение за складирање на предметите.

• Доколку се определите за скриено, односно вградено казанче во ѕидот, исто така ќе заштедите простор, а и визуелно ќе го ослободите амбиентот.

• Во малата бања избегнувајте темни бои. Плочките или ѕидот нека бидат во посветла боја - на пример, може да поставите бели плочки кои на средината ќе имаат бордура во живи бои.

• Погрижете се бањата да биде добро осветлена, бидејќи слабото осветлување создава чувство на теснотија.

• Поставете поголемо огледало во малата бањата кое визуелно ќе ја зголеми бањата.

• За крај, избегнувајте чување на непотребни ситници во бањата, со што ќе спречите просторот да стане уште помал.