Доколку во последни време сте посетиле некоја од продавниците за декоративни предмети за домот во некоја од светските метрополи, веројатно сте забележале дека во тренд е “vintage print”, односно делови од покуќнината кои биле во тренд во педесеттите години од дваесеттиот век. Садовите за чување на намирници, шолји, кутии, послужавници, како и помали парчиња мебел се отсликуваат со фотографии, постери, страни од модни списанија или дневни весници, така да на момент делуваат како рекламен материјал.

Овој начин на украсување последните години е хит во светот. Предметите за куќата насликани со ваков принт делуваат атрактивно и интересно, а добро се вклопуваат во скоро секој амбиент.

Посебно се препорачуваат за во кујната и бањата, како контраст на еднобојните елементи. Винтиџ постерите ефектно делуваат на ѕидовите. Призорот на топло кафе и печиво може совршено да се вклопи со останатите елементи од трпезаријата, а гардероберот или ѕидот на спалната соба може да го украсите со романтична сцена од познат љубовен филм.