Огледалото не стана само симбол на нашата потреба да бидеме убави (а и тоа редовно да го проверуваме) и да бидеме опкружени со убави работи, туку само по себе стана декоративно во просторот во кој живееме.

Со него, како неопходен дел од ентериерот може да се поигруваме и да постигнеме интересни ефекти, игри на облици и бои во просторот, но и итро да прикриеме некои негови недостатоци.

Огледалото во предсобјето пред се е фунционално: во него го проверуваме изгледот при излегување од станот, а треба да биде така поставено и со таква големина за да може да се види целата фигура.

  

Истовремено ова е одличен начин визуелно да го зголемиме стеснетиот дел од станот, за што е потребно и одредено осветлување. Огледалото максимално ја рефлектира светлината и ја удвојува длабочината на просторијата, па ако таа е издолжена, добро е да се постави на поширокиот ѕид. бидејќи му дава длабочина на секој простор. Огледалото е погодно за оптички илузии, кои дизајнерите мудро ги користат во јавните простори, како што се кафулињата, клубовите, дискотеките, итн.

Огледалото се става на и вратата на просторијата, на ормарот и комодата, а во луксузните вили на препотентните филмски ѕвезди едно од омилените места е над креветот - се во служба на хедонизмот и раскошот.

Со оглед на тоа дека огледалото го прима призорот пред кој се наоѓа, добро е да се постави спроти отворен простор или тераса низ која се гледа зеленило, па така, со трик може да внесеме малку природа во својот дом.

  

Иако во дневната соба неговата функционалност не е неопходна, може многу убаво да изгледа ако го третираме како слика на ѕидот. Затоа е интересно кога огледалото ќе се постави спроти омилената глетка, бидејќи на тој начин тоа станува слика, и тоа динамична, која може да ја оживее атмосферата.

Денес изборот на огледала е неограничен: од оние со габаритни, изрезбани, стилски метални рамки, со рустикални, дрвени рамки во резба, преку шарените игри со стакло, пластика, кованото железо и другите материјали, па се до наједноставните и модерни, без рамки, и тоа со најразлични правилни и неправилни облици. Се што треба да направите е да одлучите кое најдобро се вклопува во вашиот простор.

Убаво е кога во близина на огледалото се наоѓаат украсни растенија, декоративна скулптура, по некој интересен детал, со пријатно и ефектно осветлување. Ако огледалото е внимателно избрано и поставено, делот на станот во домот во кој се наоѓа го прави репрезентативен. Затоа потрудете се тоа да биде некој убаво аранжиран простор во кој најмногу уживате. Пружете му го на просторот тоа задоволство, како и на трагичниот, преубав Нарцис, да се огледува во сопствената убавина.

  на почеток