Се За Домот | Абажур од коноп

Абажур од коноп

Овие ретро-абажури од коноп може едноставно да ги направите и вие самите, и тоa во различни димензии и бои. На нив може да нанижете и/или залепите перлички, туфни ... Препуштете се на фантазијата и уживајте во изработката!

Материјал и прибор:

• Клопче коноп
• Балон на дување
• Лепило за дрво
• Ножици
• Фломастер, игла

Постапка:

Надувајте балон и заврзете го. Од неговата големина ќе зависи и големината на абажурот. Со фломастер обележете го местото за отвор кое се одбегнува при намотување на конопот, бидејќи низ него ќе треба да се провлечат електричните инсталации и сијалицата.

Намачкајте го балонот со лепило со помош на прстите. Замотајте го конопот во сите насоки околу балонот и одвреме-навреме со прстите нанесувајте лепило и на балонот и на конопот.

Кога ќе бидете задоволни од густината на балонот, оставете го да се исуши преку ноќта. На крајот треба да изгледа отприлика вака ...

Со иглата дупнете го балонот и извадете го од абажурот. Сега е потребно уште да ја провлечете електричната инсталација низ новиот абажур и да уживате во прекрасната светлина.

Мали совети:

• Доколку се определите за изработка со потенок коноп, може на одредени места да нанижете со игла стаклени перлички, па да продолжите со лепењето како на основниот пример.

• Кога абажурот ќе биде готов може со акрилна боја во спреј да го обоите.

• На абажурот како декорација може да се аплицираат свилени пеперутки или школки.

• Доколку се работи за светилка над маса во трпезарија, може да направите и сет од прстени низ кои ќе протнете салвети.

на почеток