Под поимот "color blocking" се подразбира употреба на комбинации на интензивни контрастни бои, како на пример, жолта, сина и зелена или пак розова, црвена и портокалова. Ова комбинирање на бои одлично оди со минималистички мебел во бела или црна боја, или во боја на светло дрво.

Наоѓа примена во дневните и детските соби, а поретко и во кујните. Тоа се простории кои доминираат во домот и кои треба да привлекуваат со ведрина, па затоа овој начин на комбинирање на боите е соодветен за нив. Поради интензивноста, не се препорачува за спалната соба, а исто така и за малиот ходник, кој може да стане визуелно пренатрупан и оптоварен.

Доколку се плашите од колоритен хаос, комбинирајте со аналогни бои (на пример, жолта и црвена). Притоа, не употребувајте пастелни бои, за кои нема место во "color blocking".

Притоа се наметнува прашањето – колкав дел од домот сакаме да го уредиме во "color blocking" стил. Доколку се двоумите, уредувајте со мали чекори. Така ќе дознаете кое количество на боја ви одговара вам и на вашиот простор.

Дневната соба освежете ја со неколку перничиња, вазни или на пример, рамки за слики во контрастни бои. Ако сакате поголеми зафати, обојте ги ѕидовите, набавете завеси или прекривки за мебел во контрастни бои.

Детската соба е место каде не треба да се плашите дека ќе претерате. Како доминантна боја добро е да се одбере смирувачка, како сината или зелената, а деталите нека бидат во други контрастни бои. Дури и не мора целиот ѕидот да се пребојува, туку може и на белиот ѕид да се повлече лента или две во боја. "Color blocking" е идеален за соба каде има повеќе деца, каде секое може да ја одбере својата омилена боја и на тој начин да го огради својот простор.

Доколку станува збор за новороденче, избегнувајте преголема употреба на жолта боја. Имено, жолтата боја го стимулира нервниот систем и менталната активност, но премногу жолта боја може да предизвика агресивност, страв и нервоза.