Со употреба на природните производи за чистење како што се оцетот и сода бикарбоната постои помала веројатност за надразнување на кожата и создавање на дишни алергии отколку при користење на купечките, хемиски средства. Освен тоа, тие се посигурни за децата и домашните миленичиња, во случај да ги проголтаат.

Еколошки гледано, со нивно испирање и пуштање во канализација не се загадува животната средина, а и финансиски се далеку поевтини. Со правилен избор и начин на употреба се постигнува ефект како и кај хемиските средства.

Бел оцет

Според некои истражувања, белиот дестилиран оцет има десетици корисни можности за употреба во домаќинството, од подготовка на храна до чистење на тврдокорните наслаги на каменец.

Поради високата содржина на киселина, белиот оцет има неограничен век на траење. Поради својата киселост не дозволува развој на бактерии, па така е добредојден во секоја кујна и бања.


Неколку совети како да се употребува белиот оцет:

• Исчистете и дезифинцирајте даска за режење и кујнски работни површини.

• Дезодорирање на кујната од непријатните мириси (премачкајте ја површината со оцетот и оставете 30 минути пред испирањето со вода).

• Местата на кои се појавуваат мравки пребришете ги со оцет.

• Отстранете го каменецот од тушот - натопете крпче во оцет и премачкајте го тушот или уште подобро натопете го во оцет. После неколку минути измијте го.

• Чистење ги прозорците - во водата додајте малку оцет и измијте ги прозорците.

• Оспособете ја старата четка - натопете ја во врел оцет, а потоа измијте ја со топла вода.

• Спречете создавање на каменец во туш-кабината - повремено стаклениот ѕид од туш-кабината пребришете го со оцет, а потоа измијте го.

Сода бикрабона

Еве неколку начини за употреба на сода бикарбона (хемиско име: натриум бикарбонат) како средство за чистење во домаќинството:

• Сода бикарбона е одамна познато средство за отстранување на непријатни мириси, па за таа цел посипете ја по сув тепих и тапациран мебел, оставете ја најмалку 15 минути да стои, а потоа ишмукајте ја со правосмукалка.

• Влажниот сунѓер посипан со сода бикарбона е идеално средство за чистење на сјајни површини од ростфрај (садови, славини, лонци итн.)

• Со сода бикарбона може да се отстранат повеќето мириси на мувла настанати во влажен простор.