Најновите трендови во опремување на ентериерот поттикнуваат здрав и природен начин на живот.
Светски тренд последните години е еколошкиот мебел изработен од природни и рециклирани материјали. За еко-уредување на просторот се користат и нетоксични бои, тапети од рециклирана хартија, паркет од бамбус или тепих од јута, и други предмети кои се детали во домот. На пазарот лесно може да се најде сервис за јадење од рециклирано стакло, куќичка за деца од рециклиран картон, лустер од употребувани материјали, батерии кои се напојуваат со сончева енергија... Употреба на вакви предмети допринесува за зачувување на животната околина, но и го штити здравјето и овозможува попријатен престој во просторот, поради фактот дека не предизвикуваат алергии.

Тепихот е од рециклирана волна со подлога од јута. Боите на ѕидовите се еколошки,
а завесите се органски.

Еко-дизајн

При дизајнирање и проектирање на еколошки мебел се користи рециклиран материјал или материјал од обновливи извори. Еколошкиот мебел, каде што е тоа можно, треба да има можност да се раздвојува и составува, што е предуслов за флексибилна употреба и прилагодување на секој простор. Целта на еколошкиот дизајн е да ја олесни употребата на некој предмет, да го поедностави составувањето и раздвојувањето на предметите, со цел корисникот да може сам да го состави мебелот. На крајот, потребно е да е овозможено рециклирање на предметите, или доколку тоа не е можно, барем нивно сигурно одложување. Еколошкиот мебел исто така и се пакува во еко-материјали. Чистењето и одржувањето кај овие предмети треба да биде максимално олеснето.

Сите природни материјали се еколошки

За еколошко уредување на просторот се употребуваат и подни облоги од еколошки материјал како што е бамбусот, плутата, како и теписи и подни простирки од природни влакна како што е волната, јутата, сисалот коишто не содржат хемиски соединенија кои можат негативно да влијаат на квалитетот на воздухот.


Паркет од бамбус

При еколошко уредување на домот популарни се подните облоги од т.н. одржливи материјали како што се бамбусот или плутата, коишто се вбројуваат во “eco-friendly” материјали.

Бамбусот спаѓа во фамилијата на треви, а во природата се обновува на секои три до пет години. Користењето на паркет од бамбус дава допринес во зачувувањето на шумите поради фактот што за обновување на шума потребен е период од 20 до 30 години. Бамбусот е еден од најбрзо растечките видови во светот, прилагодлив е на различни услови на живот, а постојат околу илјада видови.

Бамбусот е за 30 проценти потврд од дабовиот паркет

Паркетот од бамбус е полесен, а истовремено и до 30 проценти потврд од дабовиот паркет. Тој уште во фабриката се лакира со повеќе слоеви акрилен лак, со што се заштитува од било какво присуство на честичките прашина, што го прави да е антиалергиски.


Природните теписи – лесни за одржување

Теписите од вештачки влакна можеби се подостапни и во одредени случаи со подобри естетски карактеристики, но побрзо се уништуваат и во себе содржат хемиски соединенија.

Теписите од волна и растителни влакна како што се сисал, јута, памук и кокос лесно се одржуваат и имаат подолг век на траење.

Влакната на сисал се добиваат од листови на агава која не содржи пестициди, па на тој начин теписите се ослободени од штетни материи и непријатен мирис.

Теписите од волна се најраспространети теписи од природни влакна на пазарот. Влакната од волна може да бидат од животинска, а во последно време и од рециклирана волна. Волнените теписи се топлински изолатори, отпорни се и лесни се за одржување.

Подните простирки од природни материјали полесно се одржуваат

Суровина за производство на теписите од кокосовите влакна се лушпите од кокос, а главни земји производители се Индија и Шри Ланка. Теписите од кокос, како и од сисал се отпорни, а и подеднакво погодни за домовите, како и за канцеларии. Една од нивните карактеристики е лесно движење на тркалата од мебелот низ тепихот.


Обојте ги ѕидовите со природа

Ѕидовите и таваните заземаат најголеми површини во затворените простори. Обично боите со кои се бојадисуваат се произведуваат од синтетички хемикалии кои можат да бидат штетни за здравјето.

Поради ова најдобро е детските соби и спалните соби е да се бојадисаат со природни или еколошки бои. Тие се произведуваат од органски материи, без употреба на петрохемиски соедниненија или пестициди, кои се познати како причинители на алергиски реакции.

Еколошките бои содржат масла, екстракти и прости минерали. При нивното производство не се создаваат токсични продукти кои имаат негативно влијание на природата. Природните масла добро го покриваат дрвото и му даваат долготрајна заштита, а растителните бои се прозрачни и на ѕидовите им овозможуваат да "дишат", што не е случај кај обичните бои.