Правилно и функционално уредениот дом овозможува попријатен престој во него, а извршувањето на сите активности во него станува полесно.

Најуспешна комбинација при уредувањето на домот е спојот на дизајнот и функционалноста. Но, во пракса често се појавуваат различни проблеми или дилеми помеѓу желбите и потребите што го отежнуваат вистинскиот избор.

Совршено дизајнираните парчиња мебел, наредени во атрактивни простори, предизвикуваат восхит и желба да се имаат истите во сопствениот дом, па така честопати, и покрај видливите функционални недостатоци останува желбата – да се има ист дом како од каталогот.

Темниот под поради поголемата видливост на прашина и
гребнатини бара често одржување

Правилно и функционално уредениот дом го олеснува неговото одржување, користење и овозможува повеќенаменска организација на просторот. Тоа овозможува да не се биде роб на мебелот и на неговото одржување. Дизајнот кој е цел сам за себе, без вистинска употребна вредност и можности за примена во разни сфери, губи на својата вредност. Сепак, и функционалноста која нема никакви естетски вредности е празна и неинтересна. Затоа, спојот на овие две категории ќе даде совршена комбинација, која домувањето ќе го направи пријатно и практично.

Тенденција при уредувањето на домот треба да биде постигнување на спој на дизајн и функционалност, кои ќе бидат присутни во различни односи, во зависност од расположивиот простор, финансиските можности, животните навики итн.

Остри ивици на елементите и светла гарнитура и тепих не се
препорачуваат за семејства со мали деца

За да се постигне ова, треба да се направи анализа на начинот на животот на целото семејство, анализа на просторот, како и финансиска конструкција, со која ќе се дефинираат средствата за вложување.

Начинот на живот на семејството, како и старосната група на домашните е многу важен фактор. Семејствата со мали деца, но и зрелите парови кои живеат сами, на на кои често во посета им доаѓаат деца и внуци, треба да и дадат предност на функционалноста.

Изборот на елементи во просторот кои лесно се одржуваат и потешко се кршат, поставување на сигурносни елементи, избирање на материјали за тапацирање кои лесно се перат или се со потемни бои, избегнување на елементите со остри ивици, избегнување на стаклени предмети и влакнести подни простирки, се дел од препораките за овие семејства.








Паровите со возрасни деца или без нив, како и самците, при изборот помеѓу дизајн и функционалност често предност му даваат на дизајнот. Оние што сакаат беспрекорно уреден дом, без проблем ќе се определат за стаклени елементи, потемни подови со висок сјај, светли гарнитури за седење, висок сјај на кујнските елементи, скапоцени нежни столици, столни и подни ламби, туш кабини и мијалници во стакло. Сепак, сето ова бара секојдневно одржување и чистење.

Постојат елементи кај кои не смее да се прави компромис, односно елементи кај кои функционалноста и удобноста е примарна. Дизајнот кај нив е спореден фактор, кој крајниот производ го направи поквалитетен. Ова првенствено се однесува на изборот на столици и гарнитури за седење, кревети и душеци, како и распоредот и висината на кујнските елементи. Неудобното седење или спиење остава долгорочни последици на здравјето, а лошиот распоред на кујнските елементи го прави процесот на подготовка на храната подолг и понапорен. Поголемите станбени простори нудат поголеми можности во поигрувањето со дизајнот, а кај помалите функционалноста секогаш има предност, бидејќи често пати една просторија служи за обедување, дневен престој, спиење и работни активности.

Добриот распоред на кујнските елементи ја олеснува подготвката на храната