Купувањето на нова гарнитура за седење е еден од најважните моменти при уредувањето на домот. Притоа, при изборот треба да се земат предвид стилот на гарнитурата, квалитетот на материјалот на тапацирот, квалитетот на перниците за седење и рамот на конструкцијата, удобноста на седење, а секако и цената на чинење на гарнитурата.





Стил

• Пред сè треба да се знае намената на гарнитурата за седење – дали ќе се користи од целото семејство, дали ќе биде сместена во ходникот или пак ќе биде фокусна точка во просторот.

• Треба да се земе предвид севкупното уредување на просторот, односно дали гарнитурата е во склад со стилот во кој е уредена собата.

• Доколку сакате гарнитурата да има безвременска димензија, изберете покласична гарнитура. Избегнувајте ги екстремно трендовските стилови кои излегуваат од мода за неколку години.


Материјал за тапацирање

• Кожата (природната или еко-кожа) е посоодветен материјал за семејства кај кои почесто се случува истурање на течности, храна и сл. на гарнитурата.

• Кај материјалите со посветли бои дамките многу повеќе се забележуваат. Добро решение е можноста пресвлеките да можат да се вадат и перат.

• Материјалите кои имаат повеќе бои добро ги прекриваат евентуалните дамки, за разлика од еднобојните материјали.

• При купување побарајте од продавачот да видите како изгледа примерок од материјалот за тапацирање во саканата боја . На тој начин ќе може да добиете реална слика каков е материјалот на изглед и на допир.


Удобност

• Седнете на гарнитурата. Нека и други членови на семејството го сторат тоа.

• Дали е доволно широка? Дали ве подгрбавува? Дали ви создава пријатно чувство кое не ви дозволува да станете од неа?


Конструкција на рамот

• За долг век на траење на гарнитурата исклучително важен е квалитетот на конструкцијата.

• Рамот изработен од масивно дрво е најдобар за оваа намена, а неговите делови треба да бидат споени со завртки. Генерално правило е дека што е гарнитурата потешка, повисок е квалитетот на конструкцијата на рамот. Затоа обидете се да ја подигнете гарнитурата. Доколку е лесна, не треба да се очекува висок квалитет.


Перници за седење

• Седнете на гарнитурата, а кога ќе станете од неа погледајте дали перниците за седење останале на исто место и ја задржале првобитната форма или пак потонале и се придвижиле напред, што секако е недостаток за ганитурата.

• Кога седењето на гарнитурата е едноделно, овозможено е поудобно седење на повеќе лица, но за чистење на гарнитурата, на пр. при истурање на течност подобро е кога седењето на гарнитурата е на две или три перници.


Цена

Цената на гарнитурите може да се движи во релативно голем опсег, во зависност од квалитетот и потеклото на гарнитурата. Како и да е, при изборот секогаш треба да се запрашате дали би сакале да ја менувате гарнитурата на секои три години.