Монтажните куќи може да се дефинираат како објекти чии ѕидови претходно се изработуваат во производствени погони и како готови се испорачуваат на градилиштето, додека под терминот класична градба се подразбира ѕидање со тули или блокови.

Еве неколку аспекти за кои може да се дискутира кога станува збор за монтажни куќи:



Дизајн

Дизајнот на типските монтажни куќи, и покрај големиот избор, често не е на завидно ниво, но постои и опција за проектирање по желба на нарачателот. Дизајнот на монтажните куќи до одредена мерка е ограничен со модуларниот систем и со можноста за транспорт и вградување. И современите светски архитекти експериментираат во правец на поефтината префабрикувана градба со врвен дизајн.


Брзина на градба

Ова е една од најважните предности на монтажната градба. Фактот дека елементите се изработуваат во фабрички услови го прави овој процес независен од временските прилики и тој може да тече паралелно со изградбата на темелите на самото градилиште. Потребно е неколку месеци за да се подигне ваква куќа. За самото монтирање потребни се неколку дена, но претстои и останата работа.


Финансиски аспект

Производителите на монтажните куќи ги рекламираат по ниски цени, и до 30 проценти пониси од куќите добиени со класична градба. Сепак, во истакнатите цени најчесто не се предвидува изработката на темелите, инсталација на греењето (освен оџакот), работи поврзани со електричната инсталација, водовод и канализација, лимарски и други завршни работи, како ни прилагодување на стандардните понуди на конкретни потреби на нарачателот. Кога сето ова ќе се собере крајната цена е многу близу до цената на класично изградена куќа. Одредена заштеда се добива кај темелите на монтажните објекти бидејќи нивната конструкција е полесна, но минималната длабочина на темелите е иста и е условена со длабочината на смрзнување на тлото.

При нарачување на монтажна куќа од инвеститорот најчесто се бара 60 проценти од трошоците да ги исплати пред градбата, а остатокот по (брзото) завршување со градбата. Тоа практично значи дека сите средства мора да се издвојаат однапред, додека класичната градба овозможува ускладување на активностите со приливот на финансиските средства.

Во двата случаи постои можност да се договори “клуч на рака”, што заштедува време и нерви.

Животниот век на секој производ, па така и куќата, зависи од квалитетот на материјалот и изработката, завршната обработка и заштита. Трошоците на одржување на една куќа се исти за ист квалитет на вградените производи, независно од типот на градба.


Предрасуди

Кај луѓето за монтажните куќи постојат предрасуди од типот дека тие се "картонски кутии” кои имаат само основен дизајн, без базичен карактер. Технологијата на градба и дизајн во меѓувреме се подобрени, но ваквите куќи сеуште слабо проаѓаат на пазарот на недвижнини. Поради овие предрасуди, монтажните куќи навистина се за 30 проценти поефтини, но ова важи кога ќе сакате да ги продадете.


Отпорност на пожар и земјотрес

Дрвото како градежен материјал е поеластично од тулите и бетонот, па затоа подобро се однесува во случај на земјотрес. Монтажните куќи исто така се и доста полесни, па со самото тоа и поотпорни на земјотрес од класичните.

Материјалите од кои се изработуваат монтажните куќи би требало да припаѓаат на категоријата негориви или слабо горивни материјали, а носечките дрвени елементи треба да се обложени со огноотпорни плочи. Во тој случај при пожар би гореле само завесите, мебелот и сл.


Топлинска и звучна изолација

Надворешниот ѕид на монтажните куќи се состои претежно од плочи од гипс картон, Универ / ОСБ плочи, ПВЦ фолии, термоизолација и фасадни облоги (изотерм, стиропор...). Неговата вкупна дебелина варира и изнесува 15 - 20 сантиметри, што е значително помалку од дебелината на класичниот “сендвич” ѕид кој изнесува 38 - 48 сантиметри (тули или блокови, PVC фолија, термоизолација, воздух).

Квалитетно и правилна изведена термоизолација со соодветна дебелина, која ќе ja чува енергијата и ќе одржува пријатна микроклима во домот, може и треба да биде изведена и при класичниот и при монтажниот тип на градба.

Својствата на звучната изолација се на страната на класичниот тип на градба.