На Миланскиот саем на ентериери 2009 беа прикажани најновите трендови во уредување на просторот, мебелот и расветата. И понатаму со просторот доминира белата боја, а новина е сè поголемата присутност на сивата боја. Регалите се повеќе потсетуваат на оние од 80-тите, но секако, во помодерно, минималистичко издание, додека стаклото е најдоминантен материјал во дневните соби и трпезариите.

Меѓународниот саем за мебел, ентериер и расвета, кој се одржа од 22 - 27 април 2009, на површина од 230.000 m² собра преку 2700 изложувачи од цела Европа и 300.000 посетители, без притоа да се забележи дека економската криза оставила трага на организацијата, квалитетот на презентациите на производите, како и на бројот на изложувачи и посетители.

Интересно, со акцент на иновативност, широка палета на материјали, стилови и бои се основните впечатоци од саемот, па така секој, во зависност од желбите, потребите и вкусовите, може да пронајде трендовско решение за себе.

Во однос на минатогодишните трендови на уредување на дневниот престој не се забележува битно поместување. И понатаму главен елемент е регалот со полици за книги, но со еволуција на своето обликување прераснува во елемент кој потсетува на регалите од 80-тите години од минатиот век.

Дизајнот е секако, помодерен – минималистички, но елементите кои го сочинуваат се идентични – отворени и затворени полици и ормари. Се изведуваат во полна висина на таванот и ја покриваат целата површина на ѕидот. Истакнат дел на таквата композиција е елементот за сместување на ТВ уредот и тоа на тој начин што се изведува во друг материјал или боја, а најчесто е подвижен, со можност за вртење. На тој начин аголот на гледање на ТВ приемникот може во секоја прилика да се прилагоди на местото на седење. Тој елемент се третира на идентичен начин и во случаите каде се сместува самостојно во просторот.

Покрај сè поголемата примена на природно дрво и материјали кои ја имитираат неговата природна структура, апсолутно доминантен материјал за изработка на елементите во дневниот престој станува транспарентното стакло. Се појавува како составен дел на полиците, клуб масичките, комодите, плакарите ... Трпезаријата, која редовно е приклучена со дневната соба, исто така е опремена со стаклена маса и комода со стаклена облога.

Бојата која апсолутно доминира со ентериерите и оваа година е белата боја, а се повеќе се употребува и сивата боја. Ефектите во просторот се засилуваат со додавање на елементите во просторот во нагласена црна, црвена, виолетова, жолта или зелена боја. Сјајот и блескавилото на среброто и златото содржани се во луксузните парчиња на мебел, кои во вакви изведби, без разлика на вкусовите, изгледаат многу импресивно.

Гарнитурите за седење се изведуваат во рамни геометриски облици или се благо заоблени, а претежно се еднобојни. Акцентот е ставен на удобноста и практичноста па така одредени елементи се подвижни, за да може едноставно да се трансформираат во удобни лежалки или кревети за спиење.

Трпезариите се опремени со дрвени, пластични, како и со тапацирани столови со ткаенина или кожа во најразлични бои и облици, а често се појавуваат и клупи со модерни аголни изведби кои се особено практично решение за потребите на сместување во трпезариите во помали станови.

Спалната соба не се употребува само за спиење, туку и за престој и дружење во неа. Креветите се со исклучително нагласени заглавја, а плакарите се со врати изработени од стакло или обложени со ткаенина или кожа. Во поголемите спални соби плакарот се заменува со отворен гардеробен простор кој е соединет со собата. Во истиот простор се наоѓааат мали фотељи со масичка, комоди и мини регал, во чиј склоп се поставува ТВ уред.

Во уредувањето на досега опишаните простории и понатаму се наѕираат барокни детали, а задолжително е осветлувањето со големи лустери и ламби.

Детските соби и понатаму се весели, практични и со разиграни бои кои во останатите простори се искористени во деталите. Како мотив на површините на плакарите се појавуваат и ликови од стрипови.

Теписите се изведуваат од природни и вештачки материјали со нагласено ткаење, јазли или влакна во умерени бои и со доминантен геометриски мотив.

На саемот беше изложен и широк асортиман на расветни тела кои ја покажуваат различноста во функционална и декоративна смисла – од надворешно јавно осветлување на столбовите, кое потсетува на времето на нашите баби, до ултрамодерно лед-осветлување, расветни тела со кристали и минималистички дизајнирани тавански и ѕидни светилки.

За повеќе слики од Саемот на ентериери Милано, 2009 кликнете тука за влез во галеријата: