Се За Домот | Украсни перници

Украсни перници

Расфрлани или уредно наредени на креветот, троседите, фотељите, столиците, па дури и на подот, украсните перници се многу благодарен детал на секој ентериер. Убаво изгледаат, удобни се за излежување и седење, а со нив може потполно да се смени изгледот на просторијата. Искористете ги за да ја оживеете монотоната дневна соба, за да ја направите помодерна старомодната, или пак да ја урамнотежите собата.

При изборот на бои, материјали, важно е да ја пролагодите не само бојата на каучот или столиците, туку и бојата на тепихот како и на другиот мебел за да не се претвори дневната соба во кич. Просториите наместени со светли и претежно еднобојни предмети може да ги “подигнеме” со шарените перници во живи бои, особено ако ги услогласиме со, на пр. прекривката на масичката во дневната соба, или со завесите. Можат да бидат од ист материјал како што е на троседот и фотељите. Но, истотака, со пресвлаката со жолти, портокалови и црвени пруги убаво ќе изгледаат и три еднобојни перници во тие бои. Секогаш припазете, во случај да имате многу перници, тие да бидат меѓусебно ускладени. Не е на одмет во овој случај да го примените златното правило на умереност: избегнувајте премногу шарено, премногу дречаво, и воопшто било што да го има премногу.

Освен бојата, важен е и обликот, како и големината на перницата. Ако имате мал кауч, наместо две поголеми подобро изберете повеќе мали перничиња. Но, перниците од исклучително убави материјали подобро оставете ги сами. Ако ги ставите на куп со останатите, помалку ќе бидат забележени и ќе се изгуби впечатокот за нивната особеност.

Во продавниците има голем избор на перници, но доколку нешто сами сте замислиле, може и сами да ги изработите. Може да се одлучите да го искористите полнењето на старите и истрошени перници. Ако немате стари перници, во продавниците може да се набават материјали за полнење. Најчести полнење се топчиња од полиестер. Пердувите практично се исфрлени од употреба, првенствено поради предизвикување на алергија кај некои луѓе.

При изработката на перниците имате две можности. Може прво да направите обична перница, па да ја облечете во украсна навлака, или украсната навлака можете директно да ја наполните и заштитите. Во последно време перниците најчесто се полнат директно.

Материјалите прво треба да се скројат според саканата големина, па потоа рачно или со машина за шиење да се спојат на сите три страни, а четвртата треба да се сошие до пола, односно треба да се остави отвор низ кој ќе може да се полни. Доколку користите пердуви, одберете место кое лесно ќе може да се исчисти бидејќи пердувите лесно се разлетуваат. Материјалот кој ќе го ставите внатре притиснете го што е можно повеќе за да можете да ја споите четвртата страна и за да по распоредувањето на материјалот перницата да добие убав облик. Ако немате машина за шиење, можете рачно да го сошиете, притоа користејќи подебел конец во интересна боја. Можете и да го порабите во рустикален стил.

Истотака на средината на перницата може да направите ликови по ваша желба, или да извезете пригоден текст доколку ја подарувате перницата. Можете и да пришиете разни додатоци на перницата, на пр.перлици, или на рабовите волнени пуфни.

на почеток