Претходно одгледувана само во стакленици, сега акалифата успешно се одгледува и како собно растение. Има зелени назабени листови и црвени реси кои може да бидат долги до 40 cm и растат во текот на цело лето. Расте до 1,5 m во висина, но може да ја кастрите во пролет или есен за да има помал раст.

Не е едноставна за одгледување бидејќи бара многу влажен воздух, па мора секојдневно да се оросува со млака вода. Во периодот на активен раст одржувајте ја земјата влажна, а во зима полевајте ја поретко, но не дозволувајте земјата целосно да се исуши. Најдобро е да ја полевате со млака вода бидејќи не и одговара студената вода од водовод.

За да има убаво обоени листови и впечатливи цветови поставете ја на светло место, но не на директно сонце. Чувајте ја во просторија каде температурата нема да падне под 15°С бидејќи листовите и паѓаат поради многу ниски ноќни температури.

Се размножува многу едноставно со помош на резници или млади изданки кои растат покрај матичното растение. Само одвојте ги и насадете ги во земја која ќе биде добро дренирана. Прихранувајте ја еднаш седмично со течно ѓубриво, и тоа од пролет до есен.

Во доцна пролет треба малку да се поткастри и да се пресади. Младите резници од кастрењето може да се употребат за размножување.