Ова е интересно растение кое доаѓа од семејството Gesneriaceae, чии најпознати претставници се африканската темјанушка и глоксинијата.

Има повеќе видови на стрептокарпус, и главно сите потекнуваат од прашумите на Јужна Африка. Еден од поинтересните е хибридот Concord Blue (на сликата), кој има месести, влакнести, овални, темнозелени листови, густо наредени на стебленце кое е малку извиткано. Сините цветови растат во пар на нежни стебленца.

Треба да се посади во висечка саксија и да се смести на блага сенка. Редовно залевајте го за да биде компостот влажен, а бидејќи е на сенка тоа значи од прилика секој втор ден во лето, а кога температурите не се многу високи и поретко. Прихранувајте го на секои три седмици со течно ѓубриво за растенија кои цветаат.

Од пролет до есен чувајте го надвор на отворено, а кога температурите ќе почнат да паѓаат и има опасност од мраз, внесете го внатре, ставете го на светло место без директно сонце и полевајте го многу малку.

Се размножува со резници кои многу лесно се закоренуваат.