Се За Домот | Растенија во терариум

Растенија во терариум

Терариумот е колекција на компатибилни растенија кои растат во затворен или парцијално затворен сад. Креирањето на терариумот кој што е исполнет со папрати и со други мали растенија претставува забавен начин на создавање на минијатурен пејзаж во домот. Лесното одржување на растенијата во терариумот е идеално за оние кои се презафатени и немаат премногу време за нега на растенијата.

Собните растенија во текот на зимата страдаат од неповолни услови на влажност и температура во просторијата. Терариумот им нуди услови кои го овозможуваат стаклениците. Освен тоа, дозволува да одгледувате растенија кои бараат висок степен на влажност, кои најверојатно би свенале во сува атмосфера во становите кои се загреваат. Тоа значи дека во терариумот има подеднаква влажност на воздухот што е овозможено со стаклениот сад кој при врвот се стеснува.

Еднаш кога ќе се посадат растенијата во терариумот, тој почнува да создава своја сопствена клима. Растенијата во терариумот ја испаруваат влажноста преку сопствените лисја, која пак се кондензира на стаклото и влегува во земјата. Овој “ефект на дожд” му дозволува на терариумот да опстои со недели без полевање. Топлинскиот режим е истотака изедначен, бидејќи садот ги спречува промените на температурата околу растението, настанати поради промената на температурата во просторијата. Сепак, треба да се знае дека терариумот не смее да биде изложен на директна сончева светлина.

Избор на растенија за терариум

Како и кај секој проект во градина, изборот на погодни растенија за терариум е исклучително важен. Растенијата во терариумот треба да бидат компатибилни што се однесува до светлината, полевањето и потребата за влажност, односно мора да бидат способни да преживеат во исти услови како и нивните “соседи”. Растенијата треба да бидат и бавнорастечки. Секогаш купувајте ги најмалите и најздрави растенија кои може да ги најдете. За да се спречат инсектите и разни болести, користете само квалитетни растенија.

Предлогот за растенија во терариум гласи: растенија кои сакаат влага и кои остануваат релативно мали, тропски и суптропски варијации, минијатурни растенија кои цутат, Африкански љубичици, гераниуми, куќна среќа (Helxine soleirolii), бршлен, сите видови папрати, Spatifilum, Hlorofitum, Potos, Kroton (му додава боја на терариумот). Во терариумот може да успеваат и кактуси и други сукуленти, под услов да го ограничите полевањето на еднаш месечно. За подобар ефект може да додадете и мов, мал папрат, семки од трева.

За да терариумот изгледа поинтересен, изберете растенија со различни висини, облици, текстури и бои. За терариумот може да употребите и растенија и семки. На тој начин во него може веднаш да уживате, а со текот на времето тој ќе расте и ќе се менува.

Избор на сад за терариум

Кога станува збор за избор на сад за терариум, може да ја употребите и вашата фантазија. Постојат многу видови на готови терариуми, но може да употребувате и шишиња, тегли, аквариуми и слично. За почетниците се препорачува терариум во некој поголем, отворен сад како што е аквариумот. Во таков сад полесно се работи, а после некое време, со стекнување на искуство ќе може да се снајдете и со различни држалки и стапчиња за садење внатре во садот со тесно грло, што потсетува на изработка на брод во шише

Предлози за садови: аквариум за риба, тегли, садови со поклопец, шишиња со различни облици и големини, галони за вода, било кој сад кој е стаклен или е од проѕирен материјал низ кој може да продре сончева светлина. Терариумот може да биде посаден во нормално шише со тесно грло и тоа е најефектниот и најчест изглед на терариумот. Поголемите шишиња овозможуваат да се стават поголеми растенија и аранжирањето да биде подетално. При изборот на шише земете ја предвид големината на отворот. Помалиот отвор го прави одржувањето посложено. Исто така, шишето треба да има чеп или поклопец.

на почеток