Ова собно растение го добило името по еден англиски градинар. Има меснати, зелени листови, долги 5-8 cm и бели ѕвездести цветови со црвена точка во средината кои се групирани. Цветовите имаат благ мирис и додека цветаат испуштаат течност слична на мед. Периодот на цветање започнува на почетокот на јуни и трае до есен.

Мора да му овозможите потпора на која ќе расте, а во текот на годината може да порасне и половина метар.

Не смее да ја менувате положбата на саксијата, особено додека е полна е со пупки и цветови, бидејќи ќе ги отфрли. Секако одбегнувајте и провев.

Во периодот на раст сместете го на светло место, а нема да му пречат и час-два утринско или вечерно сонце (источен или западен прозорец, подобро западен). Во периодот на мирување ставете го во постудена просторија (околу 10°С).

Полевајте го умерено и дозволете малку да се исуши компостот во лето. Во зима полевајте го еднаш на две седмици. Овозможете му добра дренажа, и по можност насадете го во земјена, а не во пластична саксија.

Прихранувајте го во периодот на раст на секои 3 седмици.

Немојте често да ги пресадувате старите растенија, бидејќи најверојатно нема да цветаат следната година. Инаку, растението почнува да цвета кога ќе има 2-3 години.

Никако не ги кинете цветните стапчиња на цветовите кои прецутеле, бидејќи на тие места ќе израснат цветови и следната година.

Се размножува со резници долги 8-10 cm (нека имаат и дрвенест дел) кои може да ги ставите во вода. Кога ќе пораснат коренчиња пресадете ги во компост.