Сансеверијата е цвеќе кое е карактеристичнo по своите исправени, долги листови кои нараснуваат и до 80 cm во висина.

Во зависност од видот на листот се разликуваат по шарите и бојата. Претежно се одгледуваат три видови: Sansevieria trifasciata која има темно зелени листови на кои се наоѓаат попречни сивкасти пруги, другиот вид е Sansevieria trifasciata var.laurenti која има жолто-зеленкасти листови со преубав жолт раб и третиот вид е Sansevieria hahnii која е нешто пониска сорта, но затоа има многу широки листови.

Сансеверијата потекнува од тропските делови на јужна Африка, а сега е одомаќинета во нашите домови, првенствено поради поради отпорноста и лесното одржување.

Земјата во која ја садите треба да биде пропусна бидејќи не сака преголема влага. Затоа е погодна за оние кои немаат многу време за нега на растенијата. Во поглед на сместувањето и изборот на место, може да издржи и голема изложеност на сонце и сенка. Сепак, доколку ја чувате во сенка губи на убавина и нејзините шари стануваат помалку видливи. Бидејќи не сака многу влага, и да ја ставите до радијатор нема ништо да и се случи.

При залевањето треба да се внимава земјата да не е целосно влажна, туку треба да се засуши помеѓу две залевања. Преголемата изложеност на влага може да предизвика нејзино трулење. Во текот на зимата доколку растението е на постудено место (но не под 10°С), може да се залева и еднаш месечно, додека во лето поднесува почесто и пообилно залевање. При залевањето водата не треба да дојде во срцето на растението. Водата која ќе се собере во подлошката треба да се испразни.

Сансеверијата има мал и плиток корен, па затоа садете ја во плитки, но широки саксии. Таа се пресадува само кога и е премала саксијата. Најдобро е да ја пресадите во пролет и тоа во лесна, плодна земја со додаток на 15% речен песок. Земјата во која се пресадува треба да има добра дренажа – одвод на вода. Се размножува со резници и со делење на коренот. Доколку ja размножувате со резници, таа ќе го изгуби убавиот жолт раб и жолтеникавата боја.