Ова растение најчесто се одгледува поради интересните сплескани мешунки во кои ги чува семките за нови, млади растенија. Мешунките се елипсести, а кога ќе се исушат се делумно проѕирни и поради нивниот изглед се нарекува растение на парите.

Не е тешко за одгледување и најдобро успева во полусенка на влажна почва. Се сее во средината на април или почетокот на мај и тоа директно во почвата. Ако веќе сте го имале тогаш е многу веројатно дека и само ќе се посее. Расте и како самоник во потоплите краеви. Над зелените назабени ливчиња во рано лето се појавуваат розови или бели цветчиња со 4 латици кои се споени во класести цветови. Ако сакате да ги дочекате „паричките“ тогаш не треба да ги кинете овенатите цветови.

Сребренката е двогодишно растение и во првата година има неколку цветови, но целосно ќе порасне во грмушка од 70-90 cm во втората година. Тогаш и се создаваат мешунките со семе. Во средината на август се режат сушените стебленца со мешунки, се врзуваат како букет и се сушат свртени надолу, под сенка на отворено. Исушените мешунки се лупат за да остане само средниот слој и може да се употребуваат во разни цветни аранжмани.

Ако живеете во постудени краеви во текот на зимата покријте го коренот со тресет, листови или ситни гранчиња за да бидете сигурни дека нема да смрзне.