Овој кактус, како и поголемиот број кактуси, потекнува од Мексико. Има долги листови кои се тркалезни на дното и имаат назабени краеви. Цветовите се јавуваат на листовите кои се постари од две години, и може да бидат бели, розови и црвени. Постојат и двобојни видови, така наречени кактус-орхидеја.

Чувајте го надвор на светло место, но не изложен на директно сонце. Во текот на растењето и цутењето потребна му е повеќе влага. Кога ќе престане да цути полевајте го еднаш седмично, а во зима многу ретко. Не дозволувајте да остане вода во подлошката, бидејќи прво ќе почне да пропаѓа коренот, а потоа и целиот кактус.

Во периодот на буен раст (пролет и лето) на секои петнаесет дена прихранувајте го со течно ѓубриво за кактуси.

Кога надворешната температура ќе падне на 5-6°С внесете го внатре и ставете го на светло место, во не многу загреана просторија. Листовите кои ќе избијат во текот на зимата најчесто се тенки, тркалезни и светли, и нема да дадат цветови, па затоа отстранете ги.

Лесно се закоренува со резници од листовите. Резниците не ги ставајте во вода, туку забодете ги директно во мешавина од песок и компост.