Традиционалните гипсени и цементни украси се декоративни елементи кои со векови биле популарни. Тие се составен дел од античките, викторијанските и другите класични ентериери, но и денес се популарни и наоѓаат своја примена во ентериерите со отмен изглед.

Елегантните верзии на класичните декоративни елементи во вид на бордури, лајсни, розети и понатаму се составни делови на софистицираните ентериери.

Денес гипсените декоративни елементи се изработуваат како префабрикувани од посебен вид на гипс. Се лепат на ѕидот со помош на градежно лепило и може да се бојат.

Гипсената декорација допринесува за полуксузен изглед на просторот. Обичниот бел ѕид со гипсен декор добива акцент и станува оплеменет. Големиот избор на гипсени елементи дава широк спектар на декорирање на просторот. Најчесто се употребуваат бордури на споевите на ѕидовите и таванот. Бордурата може да се постави и како заштитна лајсна на спојот на подот и ѕидот и како декоративна лајсна по средината на ѕидот. Профилите на гипсените бордури варираат од едноставни до китнести и нагласени. Истотака, постојат и гипсени декорации за врата и за прозорци, како и за камини.

Гипсените бордури може да ја нагласат хоризонталноста и вертикалноста на ѕидот.

Хоризонталните бордури на спојот на ѕидот и таванот може да имаат и простор во кој ќе се смести осветлување. Ефектот на индиректна расвета дополнително ги истакнува профилираните бордури и го издигнува таванот.

Ѕидовите може дополнително да се украсат со гипсени рамки во долната и горната зона. Рамките во горната зона се погодно место за поставување на слики и огледала. Рамките нудат можност за боење на ѕидот на местото каде што се поставени со друга боја или за лепење на декоративни тапети. На овој начин ѕидот се истакнува и добива своја особеност.

Посебен вид на гипсена декорација е розетата. Таа најчесто се поставува на средината на таванот, каде што се наоѓа директната расвета. Профилирањето на розетите може да биде најразлична, од цветна до геометриска.

Најдобар ефект кој се постигнува кај примената на гипсената декорација е во играта на боите. Најефектни се бели бордури во комбинација со обоен ѕид. Без разлика дали станува збор за пастелна или интензивна боја, белите гипсени бордури доаѓаат до израз и го прават просторот посебен. Ѕидните бордури се практични за премин од една во друга боја на ѕидот или за комбинирање на различни материјали.